Leiwe Lüe,
wu me Ökumene un Plattdütsk tehaupe brengen kann, häd eenige van ju lesten Sönndag, 11. Oktober, in Lengerke inne Kiärken St. Margareta sülben metbeliäwet.
In Corona-Tieten is olles ewwas änners, os wi dat süss gewuehnt sind. Me mosse sick anmellen un de Afstands- un Hygieneregeln inhaulen. Oaber – doa sind de Lengerkske Heimatverein un de Nordwalder Kiepenkerlchor eener Meinung – et draff auk nich olles utfallen! Üöwer den Kiepenkääl van Lengerke, Günter Tierp, häw de Kiepenkerlchor anbuon, in eenen plattdütsken Gottesdienst te singen. De Freude in’n Heimatverein was graut – un auk bi Pastor Peter Kossen! De küert fö sien Liäben gäden Platt un is manssen soagar in’t Radio met plattdütske Andachten te höäden. He möük den Vöschlag, den Gottesdienst unner de Üöwerschrift „Maak diene Ogen aopen“ te stellen, also „Maak diene Augen löss“ of auk „Kiek äs genau hen!“. Wi Mensken häd Verantwortung fö de Schöpfung, drüewet fö Elend un Ungerechtigkeit inne Welt de Augen nich veschluten un auk nich touloaten, dat Leiharbeiters ut Osteuropa sau erbärmlick utbeutet wäd. „Maak diene Ogen aopen!“ appelleerde Pastor Kossen mährmoals an de Anwiêsenden.
De Kiepenkerlchor dröüg Kiärkenlieder up Platt vö un auk de Gemeinde süng Lieder up Platt. De Liäsung un de Fürbitten häd Gerda Zirbes un Günter Tierp van’n Heimatverein vödriägen. Toun Schluss süngen olle tehaupe dat Lied „Härgott, graut is diene Macht“ noa de Melodie „Großer Gott, wir loben dich“.
Leider was nich inne ganzen Kiärken olles guet te vestauhn. Dat mott in’n naigsten plattdütsken Gottesdienst biäter wäden. Also, Lüe, üöwerlegget ju, of de nich bi ju stattfinen kann.
Dat wünsket sick
Gerda Zirbes
„Häergott, graut is diene Macht!" (Melodie: „Großer Gott, wir loben dich")
Härgott, graut is diene Macht!
Leiwe Här, wi willt di priesen!
Du allein düör Naut un Nacht
kanns den rechten Weg us wiesen.
Mag de ganze Welt vegauhn, diene Macht, de bliw bestauhn.
Olls, wat liäwt up düsse Welt,
inne Lucht, up't wiete Water,
buoben üöwer't Wolkentelt –
olls röpp tou di: „Use Vader!"
Helps us oll düör Christi Daut, nimm us up in dienen Schaut!
Härgott, reik us diene Hand!
Deipste Naut, de lährt us biäden.
Dämp den Krieg, den wilden Brand,
giw us olle wä den Friäden!
Help us rut ut düsse Nacht! Härgott, graut is diene Macht!
Alle, denen das Plattdeutsche nicht so vertraut ist, können die Artikel mit der Ankündigung des Gottesdienstes in unserer Nachbar-Kirchengemeinde und den anschließenden Bericht in den Westfälischen Nachrichten auf hochdeutsch nachlesen ;-)